انگلینڈ انڈر 19 نے پاکستان انڈر 19 کےخلاف چار روزہ یوتھ ٹیسٹ کے تیسرے دن اپنی دوسری اننگز میں ایک وکٹ کے نقصان پر 121 رنز بنائے تھے۔

اس سے قبل پاکستان انڈر 19 اپنی پہلی اننگز میں 305 رنز بناکر آؤٹ ہوگئی۔

میزبان ٹیم کو پہلی اننگز میں 28 رنز کی برتری حاصل ہوگئی جو اب مجموعی طور پر 149 رنز کی ہوگئی ہے اور اس کی 9 وکٹیں باقی ہیں۔

انگلینڈ انڈر 19 کی دوسری اننگز میں سیلوی کلنٹن نے 121 گیندوں کا سامنا کرتے ہوئے 9چوکوں کی مدد سے 68رنز اسکور کیے ۔ وہ پہلی اننگز میں صفر پر آؤٹ ہوئے تھے۔

آئزک محمد نے 55گیندوں پر 7 چوکوں کی مدد سے46رنز کی اننگز کھیلی۔یہ دونوں دوسری وکٹ کی شراکت میں 107رنز کا اضافہ کرچکے ہیں۔

عبدالسبحان نے گرنے والی واحد وکٹ حاصل کی۔

اس سے قبل پاکستان انڈر 19 نے 257 رنز 6 کھلاڑی آؤٹ پر اپنی پہلی اننگز شروع کی تھی۔ محمد صیام 21 رنز بناکر آؤٹ ہوگئے ۔ انہوں نے حسنین عباس ڈار کے ساتھ ساتویں وکٹ کی شراکت میں54 رنز کا اضافہ کیا۔

عبدالسبحان 4 رنز بناسکے۔

حسنین عباس ڈار نے ذمہ دارانہ بیٹنگ کرتے ہوئے 5 چوکوں کی مدد سے 57رنز اسکور کیے۔

مینی لمسڈین نے 52 رنز دے کر 5 وکٹیں حاصل کیں۔ کپتان رالفی البرٹ نے 58 رنز دے کر 3 کھلاڑیوں کو آؤٹ کیا۔

پاکستان انڈر19 ٹیم یوتھ ٹیسٹ کے بعد چار ون ڈے میچز بھی کھیلے گی جو 9 ۔12 ۔14۔ اور 16 ستمبر کو کھیلے جائیں گے۔