پاکستان کرکٹ بورڈ نے سابق جنوبی افریقی کرکٹر مائیکل اسمتھ کو پاکستان مینز کرکٹ ٹیم کا بیٹنگ کوچ مقرر کر دیا ہے۔

46 سالہ اسمتھ ریڈ بال اور وائٹ بال، دونوں فارمیٹس میں قومی ٹیم کے ساتھ کام کریں گے۔

مائیکل اسمتھ نے 2003 سے 2013 کے دوران 89 فرسٹ کلاس، 72 لسٹ اے اور 16 ٹی20 میچز کھیلے۔ دائیں ہاتھ کے بیٹر نے تینوں فارمیٹس میں مجموعی طور پر 7,029 رنز بنائےجن میں 9 سنچریاں اور 40 نصف سنچریاں شامل ہیں۔

لیول فور کوچنگ کی اہلیت رکھنے والے اسمتھ پاکستان سپر لیگ کی تین فرنچائزز اسلام آباد یونائٹڈ کراچی کنگز اور ملتان سلطانز کے کوچنگ اسٹاف میں شامل رہے ہیں ۔

وہ آسٹریلیا کی ہوبارٹ ہریکینز اور کرکٹ تسمانیہ کے ساتھ بھی بیٹنگ کوچ کے طور پر خدمات انجام دے چکے ہیں۔

کوچنگ کنسلٹنٹ کے طور پر اسمتھ جنوبی افریقہ کی ، کے زیڈ این اِن لینڈ اور ایسٹرن پراونس ٹیموں کے ساتھ بھی کام کر چکے ہیں۔

دو سالہ معاہدے کے تحت بیٹنگ کوچ مقرر کیے گئے مائیکل اسمتھ 19 اگست سے انگلینڈ کے خلاف شروع ہونے والی تین ٹیسٹ میچوں کی سیریز سے قبل پاکستان ٹیم کو جوائن کریں گے۔