نیشنل ویمنز ٹی ٹوئنٹی ٹورنامنٹ میں جمعرات کے روز کھیلے گئے میچوں میں انونسیبلز نے چیلنجرز کو 7 وکٹوں سے ہرادیا ۔اسٹارز نے کانکررز کو 6 وکٹوں سے شکست دے دی۔

بوہرنوالی گراؤنڈ فیصل آباد میں چیلنجرز نے پہلے بیٹنگ کرتے ہوئے 20 اوورز میں 7 وکٹوں پر 143 رنز بنائے۔کومل خان نے ایک چھکے اور 10چوکوں کی مدد سے 71 رنز اسکور کیے۔انوشا ناصر اور عروب شاہ نے دو دو وکٹیں حاصل کیں۔

انونسیبلز نے16.2 اوورز میں تین وکٹوں کے نقصان پر مطلوبہ اسکور پورا کرلیا۔گل فیروزہ نے 9چوکوں کی مدد سے 63 رنز بنائے اور وہ آؤٹ نہیں ہوئیں۔عروب شاہ نے 8چوکوں کی مدد سے 48 رنز اسکور کیے۔ام ہانی نے دو وکٹیں حاصل کیں۔

جواد کلب گراؤنڈ میں کانکررز پہلے بیٹنگ کرتے ہوئے 19.5 اوورز میں 111 رنز بناکر آؤٹ ہوگئی۔راویل فرحان نے 31 رنز بنائے۔حفصہ خالد نے صرف 9 رنز دے کر 4 وکٹیں حاصل کیں۔طوبی حسن نے بھی 4 وکٹیں 20 رنز دے کر حاصل کیں۔

اسٹار نے 16.4 اوورز میں چار وکٹوں کے نقصان پر ہدف حاصل کرلیا۔ارم جاوید نے38 رنز اسکور کیے۔علیسا مختیار نے دو وکٹیں حاصل کیں۔