ہیڈنگلے ٹیسٹ میں بابر اعظم کی شرکت سے متعلق غیر یقینی صورتحال منگل کی دوپہر اس وقت ختم ہوگئی جب ہیڈ کوچ سرفراز احمد نے تصدیق کردی کہ بابر انگلینڈ کے خلاف سیریز کے پہلے ٹیسٹ میں حصہ نہیں لے سکیں گے۔

سرفراز احمد کے مطابق بابر اعظم کو گزشتہ ہفتے وارم اپ میچ کے دوران ہاتھ پر لگنے والی انجری کی تکلیف اب بھی محسوس ہورہی ہے۔ تاہم کوچ نے امید ظاہر کی کہ وہ 27 اگست سے لارڈز میں شروع ہونے والے دوسرے ٹیسٹ کے لیے فٹ ہوجائیں گے۔

بابر کی عدم موجودگی میں سلمان علی آغا پہلی مرتبہ پاکستان ٹیسٹ ٹیم کی قیادت کریں گے۔ سرفراز احمد نے یہ بھی تصدیق کی کہ شان مسعود، جن کی انگلی ویسٹ انڈیز میں پہلے ٹیسٹ کے دوران فریکچر ہوگئی تھی مکمل فٹ ہوچکے ہیں اور سلیکشن کے لیے دستیاب ہیں۔

بابر کی غیر موجودگی پاکستان کے لیے بڑا دھچکا ہے، خاص طور پر ایسے وقت میں جب ٹیم پورٹ آف اسپین ٹیسٹ اور پروفیشنل کاؤنٹی کرکٹ سلیکٹ الیون کے خلاف متاثر کن کارکردگی کے بعد ردھم حاصل کررہی تھی۔ خود بابر کی فارم بھی بہتر ہورہی تھی اور کپتانی دوبارہ سنبھالنے کے بعد انہوں نے 23، 58 ناٹ آؤٹ، 88 اور 24 ناٹ آؤٹ رنز بنائے ہیں، تاہم دسویں ٹیسٹ سنچری اب بھی ان سے دور ہے۔ انگلینڈ کا دورہ بابر کے لیے پہلے بھی انجری کے باعث متاثر ہوچکا ہے۔ 2018 میں ہاتھ میں فریکچر کے باعث ان کا دورہ ادھورا رہ گیا تھا۔ انگلینڈ میں کھیلے گئے چار ٹیسٹ میچوں میں بابر نے 263 رنز بنائے ہیں جن میں تین نصف سنچریاں شامل ہیں۔

سلمان علی آغا کے لیے یہ ٹیسٹ بطور کپتان ڈیبیو ہوگا۔ انہیں طویل عرصے سے بابر اعظم کا نائب تصور کیا جاتا رہا ہے، تاہم پی سی بی نے کبھی باضابطہ طور پر نائب کپتان کا اعلان نہیں کیا، جس کی وجہ سے غیر ضروری بحث جاری رہی۔ سلمان نے 50 ٹی ٹوئنٹی انٹرنیشنل میچوں میں بطور کپتان 31 فتوحات اور 18 شکستوں کا ریکارڈ بنایا ہے لیکن ٹیسٹ کرکٹ میں ان کی فارم پر سوالات اٹھ رہے ہیں۔ انہوں نے 27 ٹیسٹ میچوں میں 1,683 رنز بنائے ہیں، تاہم ان کی آخری سنچری کو 12 ٹیسٹ میچ گزر چکے ہیں۔

وارم اپ میچ میں 14 اور 6 رنز بنانے کے بعد اب قیادت کی اضافی ذمہ داری سلمان کے لیے ایک بڑا امتحان ہوگی۔

شان مسعود کے حوالے سے البتہ پاکستان کے لیے اچھی خبر ہے اور انہیں فٹ قرار دے دیا گیا ہے۔ تاروبا میں ان کی شاندار سنچری، جو انجری سے قبل ان کی بہترین کارکردگی تھی، نمایاں رہی تھی ۔ شان مسعود انگلش حالات میں بھی قیمتی تجربہ رکھتے ہیں۔ انہوں نے 2020 کے دورے کے دوران اولڈ ٹریفرڈ میں 156 رنز کی اننگز کھیلی تھی جبکہ وہ انگلینڈ میں کاؤنٹی کرکٹ کا بھی وسیع تجربہ رکھتے ہیں۔

شان مسعود کی واپسی اور سعود شکیل کی حالیہ فارم کے باوجود پاکستان کو ٹیم کے انتخاب میں ایک اہم مسئلے کا سامنا ہے۔ بابر کی کمی پوری کرنے کے لیے بیٹنگ کامبی نیشن ترتیب دینا ہوگا اور ساتھ ہی ایسا بولنگ اٹیک تشکیل دینا ہوگا جو 20 وکٹیں حاصل کرنے کی صلاحیت رکھتا ہو۔ آل راؤنڈر عامر جمال کی شمولیت پر غور کیا جارہا ہے، تاہم ان کی بیٹنگ پوزیشن اہم سوال ہے۔ انہیں نمبر سات پر کھلانے سے بولنگ مضبوط ہوگی، لیکن اس صورت میں بیٹنگ لائن کمزور پڑسکتی ہے۔

ہیڈنگلے خود بھی پاکستان کے لیے ایک سخت چیلنج پیش کرتا ہے۔ پاکستان نے اس مقام پر اپنے گزشتہ 10 ٹیسٹ میچوں میں سے صرف ایک میں کامیابی حاصل کی ہے اور اب اسے ایک ایسے انگلینڈ کا سامنا ہے جو تبدیلی کے دور سے گزر رہا ہے۔

انگلینڈ کے لیے بھی رواں سال مشکل رہا ہے۔ اسے ایشز سیریز میں 1-4 سے شکست ہوئی جبکہ نیوزی لینڈ نے بھی انگلینڈ میں سیریز جیتی۔ برینڈن میک کلم کے عہدہ چھوڑنے کے بعد مارکس ٹریسکوتھک عبوری کوچ کی ذمہ داریاں نبھا رہے ہیں، جبکہ اسٹیفن فلیمنگ مستقل کوچ کی حیثیت سے ذمہ داری سنبھالیں گے۔ ٹیم بین اسٹوکس کے دور کے بعد کے مرحلے سے بھی گزر رہی ہے اور جو روٹ دوبارہ کپتان بن چکے ہیں۔ روٹ کے لیے چیلنج یہ ہوگا کہ وہ ٹیم کو استحکام فراہم کریں، لیکن جارحانہ ’’بیز بال‘‘ فلسفے کو مکمل طور پر ترک بھی نہ کریں۔

یہ سیریز دونوں ٹیموں کے لیے انتہائی اہم ہے۔ انگلینڈ کی مضبوط ٹاپ آرڈر بیٹنگ، جس میں ہیری بروک، بین ڈکٹ اور واپس آنے والے اولی پوپ شامل ہیں، پاکستان کے بولنگ اٹیک کا امتحان لے گی۔ دوسری جانب انگلینڈ کا فاسٹ بولنگ اٹیک جس میں جوفرا آرچر، جوش ٹونگ اور گس اٹکنسن شامل ہیں، پاکستان کی بیٹنگ لائن کی کمزوریوں سے فائدہ اٹھانے کی کوشش کرے گا۔

دونوں ٹیمیں آئی سی سی ورلڈ ٹیسٹ چیمپئن شپ کی ٹیبل کے نچلے نصف حصے میں موجود ہیں، اس لیے یہ سیریز مستقبل کی تیاری اور اپنی پوزیشن بہتر بنانے کے لیے دونوں ٹیموں کے لیے ایک انتہائی اہم موقع ہے۔